Preparaziun ala crejima
Iade a Assisi
18 - 20.05.24
Dai 18 ai 20 de ma á i cresimanc dla Val Badia albü la poscibilité da passé n per de dis tla cité de san Francësch y santa Chiara. Le iade é gnü organisé tl cheder dla preparaziun ala crejima, dal’Unité pastorala Val Badia y dal Sorvisc ai Jogn Val Badia.
Acompagná dai patri y dales mognans dl Centro Francescano Giovani – Assisi á za. 70 mituns y mitans dla Val Badia podü passé 2 dis sön les pedies de san Francësch y de santa Chiara, vijitan i posć plü significatifs dla storia y dla cultura francescana, fajon deboriada n percurs sön les scincundes dl Spirit Sant. Danter ater unse ince albü l’ocajiun da vijité la fossa dl jonn beat Carlo Acutis, che gnará tosc detlaré sant.
Bëgn 17 acompagnadus y acompagnadësses dla Val Badia á ciaré che döt funzionass bun tratan chësta jita – pelegrinaje. Da dormí y da mangé á le grup ladin ciafé tla Domus Laetitiae.
Tröc é stá i momënc plajors: danter spiritualité, cultura, aurela cörta y amizizia á düc canc, cresimanc y acompagnadus, podü passé de bi dis deboriada. Rengrazié oresson chiló ince i sponsors che á daidé finanzié le iade: M2 La Val; Andy Varallo Skicarosello Corvara; Cassa Raiffeisen Val Badia; Hotel Armentarola; Impianti Colfosco; Decor Pidrô; Impianti Frenademetz Luigi.
Christian Ferdigg
Via Lucis a Oies
04.10.2024
Chiló podëis ciarié jö l’PDF dles staziuns.
La Via Lucis é n tru de 14 staziuns che mët man olache la Via Crucis se röia; dan la fossa öta de Gejú Crist. Cun chësta ón ti ciaré ala forza dla ressoreziun, olache la tristëza devënta ligrëza, la surité devënta comunité, la colpa devënta pordenanza y olache an ó ince mostré sciöche Gejú Crist s’á lascé odëi a sü compagns por ti dí da porté inant só bun messaje.
Bele d’agost á i crejimanc de vigni paisc metü man da organisé chësc trú adöm al Sorvisc ai Jogn y ales responsables dla crejima de vigni paisc. Al é gnü chirí fora por vigni staziun na imaja y scrit na reflesciun che passenâ lapró. A gauja dl bur’ tëmp á chësta Via Lucis messü gní tignida daite. Ai 4 d’otober s`á insciö i crejimanc, toc, totes, geniturs y düc i interessá incunté te dlijia sö Oies olache al é gnü porté dant les staziuns dai crejimanc, al é gnü cianté deboriada, fat reflesciuns y ala fin án ince ciamó albü la poscibilité da s’la cunté deboriada pro en pice renfrësch.
I oresson tó l ocajiun da rengrazié Pater Franz Senfter y Christian Ferdigg por les beles reflesciuns, Annamaria Fiung, Giuliana Clara, les responsables di paisc y düc chi che á daidé tl’organisaziun dla musiga, dl buffet y de döta la Via Lucis.
Nüsc Proiec
Che al sides i proiec d’isté o cursc desvalis fora por l’ann, sön nosta plata proiec.org pitunse vigni sort de ativités por jogn y jones mo nia ma.
Por savëi deplü basta druché le botun chiló dessot:
Ütia de Pütia
Na ütia ai pisc dl crëp de Pütia, gestida dal Sorvisc ai Jogn adöm ala cöra de Balsan.
Por prenotaziun y deplü informaziuns jide a ciafé la plata internet dla Ütia de Pütia!